Ein femte retning vil óg bli inkludert. Det er enno ikkje klart kva. Det vil bli teken opp åtte kandidatar i kvar spesialitet.

Prosjektet går i samarbeid med det nyoppretta Helseføretak Midt-Norge, som skal ha hand om den praktisk-kliniske opplæringa, og opplæringa av pasient og pårørande/utdanning av helsepersonell. DMF skal ha ansvaret for den teoretiske opplæringa, og ei eigen fordjupingsoppgåve som går over tre semester.

Denne oppgåva utgjer, saman med at det nå vert innført formell evaluering av kandidatane, det kvalitativt nye i pilotopplegget.

Raskare ferdig
Prodekan Torstein Vik presenterte pilotprosjektet under det Nasjonale dekanmøtet for medisin som vart arrangert på Røros 21-23 mai. Vik trur reformen vil føre til betre kvalitet på utdanninga. Vidare vil den samla utdanningstida venteleg gå ned, ved at kandidatane vert stimulert til å gjere studiet unna, helst på dei normerte fem åra.

Legeforeninga mot?
Dersom forsøket ved NTNU fører fram, vil Den norske lægeforening måtte gje frå seg ein tung aktivitet til universiteta og helseføretaka. Her er det også pengar inne i biletet. I dag vert spesialistutdanninga finansiert gjennom fond som foreninga styrer. Desse vert finansiert mellom anna gjennom pasientbetaling.

Dersom Legeforeninga må gje frå seg spesialistutdanninga, kan det bli stilt sprøsmål om framtida og råderetten over desse fondsmidlane.

Legeforeninga hadde sine representantar til stades då Vik la fram forslaget sitt. Ingen tok ordet for å argumentere mot pilotprosjektet. Avdeligsleiar Hans Holm i Legeforeninga seier i ein kommentar at ein vil vente og sjå korleis det går med pilotforsøket ved NTNU.

Fryktar du for økonomiske konsekvensar dersom forsøket fører til at universiteta og helseføretaka tek over ansvaret for godt?

- Pengar er ikkje eit tema her, seier Hans Holm i Den norske Lægeforening.

Synleggjere FoU
Under konferansen vart det diskutert kva for konsekvensar det vil få for forsking og utdanning, når helseføretaka nå tek over eit ansvar som før låg innaføre sjukehusa. Mange meinte at ein nå vil få gjort synleg kva FoU eigentleg kostar, både i form av pengar, men ikkje minst som tapt pasientproduksjon som følgje av at doktorane bruker tida til å forske.

- Det er nærast overmenneskeleg å skulle prioritere FoU i sjukehusa, når pasientane dør medan dei står på venteliste, sa direktør Geir Stene-Larsen i Nasjonalt folkehelseinstitutt.

Kjem pengane fram?
Dekan Stein A Evensen ved DMF, Universitetet i Oslo, uttrykte på si side bekymring for om pengene kjem fram, når den nye styrigsstrukturen er oppe og går. Dei fem regionale helseføretaka er det berande element i denne strukturen, men ein er heilt avhengig av at dei nye samarbeidsorgana fungerer som dei skal, sa dekanen.

- Elles er vi redd for at tilskota til universitetssjukehusa ikkje skal komme dit dei skal, sa Evensen.

Tekst og foto: Tore Oksholen