Næringsutvikling frå forskingsmiljøa var emnet under konferansen som vart arrangert av Det medisinske fakultet, NTNU. Tittelen på seminaret var "Marknadsstyrte universitet kontra fri forsking."

Borgos var ein av stipendiatane som var invitert for å fortelje om eigen forsking. Han avslutta innlegget med å etterlyse meir aktiv assistanse i prosessen frå forskingsidé til kommersielt produkt.

- NTNU må få eige patentkontor. Det er ein del av oss som kunne tenkt seg å start små verksemder, men som treng hjelp, sa Borgos.

-Dei for til USA
Korleis få til meir nyskaping - gå frå idé til produkt? Emnet er velkjent. Under paneldebatten som følgde, kom det fram argument folk gav inntrykk å ha høyrt før: Betre rammevilkår, meir pengar, fokusering på få og gode fagmiljø.

Karl Klingsheim frå MISON A/S kom likevel fram med ei ny forklaring på kvifor det går så trått med nyskaping innan forskingsindusert næringsverksemd:
- Dei som hadde nyskapingsgenane i seg, emigrerte til USA for hundre år sidan! Vi har ikkje dei menneska som kan og vil starte ny verksemd.

Suksesshistoriane
Forklaringa vart teken opp av andre i panelet. Folk synes å vera einig om at det er nødvendig å tenke langsiktig for å bringe fram nye personar/miljø med dei rette haldningane.

- Få fram dei gode døma. Suksesshistoriane. Det er dei som sel, ikkje omorganisering og strukturendringar, vart det sagt.

Av Tore Oksholen