Redaksjonen i NRKs populærvitskaplege program for barn og unge - Newton - har flytta til Trondheim. Ei heilt ny redaksjonsgruppe er etablert. Også programleiaren er ny.

Eikeseth er opphavleg frå Førde i Sogn og Fjordane. Den tidlegare stipendiaten i organisk kjemi stilte på audition i NRK. Utan journalistisk bakgrunn, men med vitskapeleg røynsle, fekk Eikeseth jobben. Kvifor?

- Fordi eg er flink, svarar ho. Og legg så til:

- Det var eit ønske om å få inn folk som kan naturvitskap.

Variasjon
Unni Eikeseth er ei mangslungen ung kvinne. Ved sidan av studiane har ho vore med i torturgruppa til Amnesty sitt studentnettverk i Trondheim. Ho er også styremedlem i Trondheim Filmklubb. Studiar i Spania, Irland og Australia har det også vore tid til.

- Det var ønsket om å ha ein meir variert arbeidsdag som gjorde at eg søkte permisjon frå doktorgradsstudiet i fjor, og nå bestemte meg for å velje bort forskarkarrieren. Dette er meir interessant. Eg likar å spreie aktivitetane, vere innom ulike miljø, seier ho.

Vi får inga programerklæring på strak arm. Først må ho gå programleiarkurs.

- Men ein ting veit eg: Det er viktig å vere naturleg, ikkje late som. Då vert du avslørt. Og: Ikkje snakke nedlatande til dei unge. Vere vanleg.

Eikeseth avløysar Ole Andre Sivertsen i jobben som programleiar. Sivertsen har vore mektig populær, og ho medgir at det kjennest litt som å "hoppe etter Wirkola."

- Eg kjem ikkje til å prøve å kopiere han, men satse på å vere meg sjølv.

Tekst og foto: Tore Oksholen