Høghus kastar lenger slagskygge jo lenger nord ein kjem. – Høgblokker kan endre lokalklimaet totalt for naboar som hamnar i skuggen, åtvarar professor Bjørn Røe ved institutt for by- og regionplanlegging.
Bør ein få bygge nye høghus i Trondheim by? Adressa har skrive om dette i fleire reportasjar den siste veka. Høvet er planar om å sette opp ein 16 etasjars blokk i Ila. Naboane protesterer heftig.
Arkitektprofessor Øyvind Aschehoug minner om at slike hus har fleire problematiske sider.
– Vinden er ei av dei. Høghus pressar vinden ned langsmed bygningen, slik at det kan verte utriveleg for folk på bakken. Sjølv har eg kontor i 12. etasje i Sentralbygg 1 på Gløshaugen. Stundom bles syklane over ende grunna lokal turbulens.
Slagskugge
Øyvind Aschehoug minner dessutan om at blokkar kastar skugge.
– Dette problemet vert større jo lenger nord ein kjem og jo lågare sola står på himmelen.
Bjørn Røe tek tak i skuggeproblematikken.
– Planleggjarane har ein tendens til å gløyme slagskuggen. Om ein har låghus aust eller nord for ei blokk, får ein heile lokalklimaet endra for dei som bur der, fordi dei hamnar i skuggen og misser til dømes ettermiddagssola. Dersom dette er tilfelle i Ila, så har man klart å øydeleggje for alle dei andre. Skuggeeffekten vert større jo meir området bak blokka skrånar.
Trondheim skyline
Ein annan diskusjon er om høghus er egna for barnefamiliar.
– Det er nesten global einsemd om at høghusa ikkje er egna for barnefamiliar, grunna vanskar med kontakt mellom foreldre i leilegheitene og barn som er ute og leiker, seier Røe. – Men når det gjeld eldre, kan dette derimot vere ein effektiv buform.
Ein annan viktig diskusjon er det byarkitektoniske.
– Her er det mange som meiner at "skyline" – det biletet ein har av byens silhuett er særs viktig å take vare på. Ut frå denne posisjonen eignar høghus seg bare i særskilde områder, seier professor Røe, og minner om at om ein observerer Trondheim frå sjøen er siloane i Ila mykje meir synlege, og karakteristiske for byens silhuett enn til dømes Nidarosdomen.
Professor Røe ber kommunepolitikarane å ta seg i akt.
– Mitt råd er at Trondheim kommune ikkje bør gjeva klarsignal før ein har tatt ein grunnleggande diskusjon om kva plass høghus bør ha i byutviklinga.
Les meir om byggeskikk i Adressa
Av Tore Oksholen
