Gjellan leiar den nye redaksjonen som produserer NRKs populærvitskaplege magasin for barn, Newton. Redaksjonen vart flytta frå Oslo til Trondheim i sommar, og gjekk samstundes gjennom full utskifting av staben.

Den 1. september debuterer den nye redaksjonen. Første programmet skal handle om minnet og evna til å orientere seg. Gjellan kunne fortelje at det er ein spent stab som ventar på folkets dom.

- Ikkje undervurdere
- Du skal aldri undervurdere ein unge. Du skal aldri kjede, og du skal aldri snakke til ungar på ein barnsleg måte. Det hatar dei. Barn avslører oss dersom vi vert belærande. Dei gjennomskodar lett velmeinte forsøk på å lure inn kunnskap, sa redaksjonsleiaren.

Newton skal i første rekke vere underhaldande. Om ungane lærer litt i tillegg, er det fint, men ikkje noko krav.

- Derfor kjem vi aldri til å gjenta fem gonger i løpet av sendinga at PI = 3.14. For mykje informasjon er alltid feil.

Tenne gnist
Sigrid Gjellan var invitert til å innleie til avspark for Forskingsdagane 2002. Den 26. september vert barn og unge invitert til Forskingstorget på Torget i Trondheim. Deltakande forskarar var møtt fram i rikt monn.

- Målet er å tenne ein gnist hos unge som vi har lyst til å sjå att seinare som studentar og forskarar, sa informasjonsdirektør Anne Katharine Dahl.

Dagleg leiar ved Vitensenteret, Atle Kjærvik, rådde dei deltakande forskarane til å bruke få ord.

- Tre setningar er for mykje. Ungane miser tolmodet og spring forbi, åtvara Kjærvik.

- Helst bør ungane fatte bodskapen intuitivt.

Vite meir
Leiaren for Vitensenteret oppfordra elles forskarane til å lage stand som appellerer til både jenter og gutar. Vidare er det viktig med tiltak som aktiviserer ungane, gjerne gjennom konkurranser. Om ein i tillegg byr fram eitt eller anna som dei kan ta med heim, til dømes sjøllaga papirfly, er det enno betre.

- Det viktigaste er likevel dette: Ungane må ha lyst til å finne ut meir, sa Kjærvik.

Tekst og foto: Tore Oksholen