Det er den første forma som er aktuell for utdanningsinstitusjonane, venteleg smidd over lesten som er nytta på helsesektoren.

Høyringsrunde
Opphavleg var det meininga å køyre ein høyringsrunde i sommar/haust, og leggje saka fram for Stortinget ved påsketider neste år. Etter dette kunne ein gje universiteta høve til å starte som særlovselskap frå årsskiftet 2003/4.

I høyringa etter Mjøsutvalet var NTNU det einaste av universiteta som stilte seg positiv til ei slik endring i eigarforma. Med ei slik haldning også i framtida vil NTNU venteleg vere åleine om å prøve seg som pilot for den nye ordninga.

Men nå kan ekspedisjonssjef Jan S Levy fortelje at departementet kjem til å leggje om heile prosessen. Levy stadfester at saka er utsett. Men ein særs ordknapp ekspedisjonssjef vil ikkje seie meir, korkje om kva årsaka til utsetjinga er, eller kor mykje ekstra tid dette vil ta.

- Alt eg kan seie, er at vi kjem med ei kunngjering om dette i nær framtid.

– To års utsetjing
- Magekjensla mi seier at prosessen kan verte utsett med opptil to år, seier NTNU-rektor Eivind Hiis Hauge.

Hauge trur noko av forklaringa på utsetjinga kan vere ønsket om å greie ut kompliserte eigartilhøve omkring universitetsklinikken og helseføretaka. Til dømes kan ulike reglar for avskriving mellom universitetet og sjukehuset føre til komplikasjonar.

Av Tore Oksholen