KRIGEN I IRAK:
Bergensstudentar demonstrerer, stille på NTNU (20.3.03, 16:02)

Medan studentane ved Universitetet i Bergen strøymde ut på gatene for å demonstrere mot krigen i Irak, var det "business as usual" ved NTNU.

Studentar i Bergen ute på gata. Foto: På Høyden

Klokka tolv torsdag føremiddag gjekk mange hundre studentar frå lesesalane i Bergen og samla seg på Muséplass for å vise sin motstand mot krigen USA nå har sett i gang i Irak. Dagsrevyen meldte i ekstrasendingar at om lag 1000 studentar møtte fram.

- Framtidas akademikarar har andre ting i hovudet enn å lese pensum og produsere vekttal. Det er enormt viktig at vi viser massiv motstand mot USAs handlingar, og tek krigens grusomheitar inn over oss, sa Ståle Holgersen frå NSU i På Høyden si nettutgåve.

Stille på Dragvoll
Det er lite som tyder på krigsmotstand, både på Gløshaugen og på Dragvoll. Då Universitetsavisa rusla over "Gata" på Dragvoll, var det "business as usual."

- Det er flott at Bergensstudentane engasjerer seg så sterkt - og det er kjempetrist at vi her ved NTNU ikkje har fått til det samme, seier Per Inge Mathisen i fredsinitiativet "Dragvoll mot krig."

Studentar i Trondheim førebels inne på Gata. Foto: Tore Oksholen

Møte på mandag
- Men vi kjem sterkt attende. Det er tillyst demonstrasjon på Torget klokka 17 i dag ettermiddag, og "Dragvoll mot krig" er med. Vidare arrangerer vi møte på Dragvoll, auditorium 10, på mandag som kjem, seier Mathisen.

Han presiserer at "Dragvoll mot krig" er eit breitt politisk intiativ, og ikkje noko som er skapt av gruppa "Internasjonale sosialistar." Mathisen er sjølv ikkje medlem av IS.

- Så vil eg legge til at det ikkje hjelper på engasjementet at NTNU har eit styre som er så feigt at det ikkje har teke initiativ til å signalisere nokon oppfatning om denne krigen, seier Per Inge Mathisen.

Av Tore Oksholen