Åtte millionar til nytt idrettsbygg (12.5.03, 13:00)

Velferdstinget gjev åtte millionar til nytt idrettsbygg på Gløshaugen. – Nå må NTNU komme etter, krev leiar for Studenttinget, Åge Halvorsen.

- Det gamle idrettsbygget er slitt og må erstattast av eit nytt, seier Åge Halvorsen.

Velferdstinget vedtok for nokre dagar sidan å ta åtte millionar kroner frå tidlegare innbetalte semesteravgifter for å vere med på å finansiere eit nytt idrettsbygg. Ein har fått utarbeidd eit forprosjekt som stipulerer bygget til å koste totalt om lag 25 millionar. Desse pengane må komme frå NTNU, Studentsamskipnaden og Høgskulen i Sør-Trøndelag.

Institusjonsansvar
- Studentvelferd er eit institusjonsansvar. Det er ikkje tilstrekkeleg å ta ansvar for den boklege lærdommen åleine. Samstundes er det eit uomtvisteleg faktum at det nåverande idrettsbygget på Gløshaugen er for gammalt og for dårleg, slår Halvorsen fast.

- Då Dragvoll fekk sitt idrettsbygg, såg ein at aktivitetsnivået auka monaleg, og det same må ein vente vil skje her.

Subsidiert?
- Årsavgifta ved senteret på Dragvoll er svært låg, samanlikna med til dømes Sats og 3T. Nokon vil seie at det vert for mykje subsidiar?

- Men tilbodet ved dei kommersielle treningssentraene er då og klart betre. Samstudnes er eit slikt tilbod som sagt ein del av studentvelferden.

Halvorsen seier at Velferdstinget nå forventar at NTNU legg ein høveleg bevilling for nytt idrettsbygg inn på neste års budsjett.

Viktig sak
Universitetsdirektør Vigdis Moe Skarstein seier i ein kommentar at dette spørsmålet vil bli synleggjort som ein del av budsjettprioriteringane for 2004.

- Eit nytt idrettsbygg på GLøshaugen er eitt av fleire moglege investeringsprosjekt for neste år. Diskusjonen er sett på dagsordenen, og kjem inn som ein av fleire investeringsønsker innanfor dei smale rammene NTNU har, seier universitetsdirektøren. Ho vil ikkje forskottere noko som helst nå, men forsikrar om at ein ser på dette som ei viktig sak for universitetet.

Tekst og foto: Tore Oksholen