Assistanse for samfunnsvitarar i naud (28.5.03, 08:54)

Kva gjer du som oppdragforskar når den som sit på pengesekken, vil noko du ikkje vil? Kan hende får du hjelp her.

- Oppdragsgjevarar som vil nytte forskingsresultat på ein måte som forskaren kjenner etisk ubehag ved, er ein sentral problemstilling i kurset vi nå tilbyr, seier Micheline Egge Grung i Den nasjonale forskingsetiske komité for samfunnsvitskap og humaniora NESH.

- Forskarar er under auka press, seier Micheline Egge Grung. Foto: Lise Ekern

Ope for alle
Grung er prosjektleiar for eit nytt nettbasert tivektalsemne i forskingsetikk for samfunnsvitskap, humaniora, juss og teologi.

Kurset er mest for forskarar som ønskjer å vidareutdanne seg innan forskingsetikk, men er ope for alle. At ein nyttar nettet, inneber at ein kan følgje det frå heile landet.

Etisk standard?
Dette er første gongen ein etablerer eit etikkurs innan desse fagområda. Den tilsvarande komiteen innan medisin har hatt eit tilsvarande kurs gåande i eit og eit halvt år.

Grung seier at ein ikkje har grunnlag for å tru at den etiske standarden mellom forskarar er dårlegare i dag, men:

- Oppdragsforskingsrapporten vår frå i fjor viser at forskarar er under eit aukande press.

Derfor er det viktig å ha fokus på desse spørsmåla, seier ho.

- Å vera forskar er å utøve ein profesjon, og då må ein vere etisk medviten. Dette er eit tilbod til forskarane om å bli det.

Uønska resultat
- Kva er det største forskingsetiske problemet i dag?
- Det er så ymse. Vår rapport kan tyde på at ei sentral problemstilling er oppdragsgjevarar ikkje ønskjer å få publisert uønska resultat. Men så er det mange forskarar som ikkje driv oppdragsforsking. Generelt er det slik at i alle fagfelt har ein spesifikke problemstillingar.

Ved sidan av å gje deltakande forskarar kompetanse til sjølve å undervise i desse spørsmåla, er ambisjonen til kurset å gje deltakarane høve til å reflektere kritisk over eiga forsking.

- Vi håper at kurset kan ruste den einskilde forskar til å møte slike etiske problem i praksis, seier Micheline Egge Grung.

Av Tore Oksholen