Noreg får truleg "grønt" universitet (10.6.03, 21:20)

Det går mot samanslåing mellom Noregs landbrukshøgskule (NLH) og Noregs veterinærhøgskule (NVH). Dermed kan eit nytt "grønt universitet" sjå dagens lys.

Det såkalla Norumutvalet foreslår nå å slå saman dei to vitskaplege høgskulane. Rapporten fra utvalet vart overlevert landbruksminister Lars Sponheim og utdanningsminister Kristin Clemet i dag, tysdag.

Dermed får ein samla ressursane innan dei "grøne" områda, og sjansane for at ein får universitetsstatus med dette som spesiale, aukar. Landbrukshøgskulen søkte allereie i april i år NOKUT - Nasjonalt organ for kvalitet i utdanningen - om status som universitet.

Landbrukhøgskulen (t.v.) held til på Ås i Akershus, mens Veterinærhøgskulen sine lokaler ligg på Ullevål i Oslo.

Oslo eller Ås?
Men som i mange norske diskusjonar om institusjonsbygging og -samanslåing, får ein også her ein diskusjon om lokalisering. Skal den nye institusjonen liggje på Ås - eller i Oslo? Det som er klart, er at ingen vil flytte på seg.

Utvalet har vore leia av professor emeritus og tidligare UiO-rektor Kaare Norum, og leverte ein førebels instilling i januar i år. Denne har vore ute på høyring gjennom vinteren og våren, og det er den endelege rapporten som nå vart overlevert statsrådane.

- Viktig votum
Rektor Knut Hove ved NLH vil ikkje forskottere noko som helst enno om dette går i boks, men:

- Det er i alle høve ein einstemmig komite som tilrår samanslåing, og eg trur det er eit viktig votum som departementet vil høyre på.

- Når vil dette kunne skje?
- Det vil venteleg kome signaler om dette ved statsbudsjettet til hausten.

Grønt?
Hove seier at spørsmålet om samanslåing ikkje vil ha noko å gjere med søknaden om å bli universitet, anna enn at det venteleg vil styrke søknaden.

- Satsar ein nå på å bli Noregs grønne universitet?
- Vi har nytta "Noregs biovitskaplege universitet" som foreslått tittel. Slik tenker vi slik NTNU tenker om dette. Og eg vil rette høvet til å sende ein takk til NTNU for å ha gått opp løypa, seier rektor Hove med eit smil.

Av Tore Oksholen