Kristeleg universitet i Noreg? (8.8.03, 13:40)

Kristeleg statsvitskap neste: Levende Ord Bibelsenter i Bergen arbeider for eit eige kristeleg universitet. Søknad er i kjømda.

Se ikkje bort frå at det vert meir hallelujastemning på Levende Ords statsvitarstudium enn det er på NTNU sitt. Foto: Levende ord

Levende Ord Bibelsenter i Bergen planlegg ein kristeleg høgskule. På lengre sikt er målet eit kristeleg universitet, skriv avisa Klassekampen.

Det er informasjonsansvarleg Bjørn Olav Hammerstad som fortel dette til avisa. Levende Ord voks ut frå pinserørsla, og har i dag om lag 3000 medlemmer. Den frittståande kyrkjelyden driv i dag ein eigen grunnskule, vidaregåande skule og ein eigen TV-stasjon.

Hammerstad fortel at dei har eit tjuetals personar som arbeider med kursplanar, samstundes som nokre utdannar seg for å få undervisningskompetansen som trengst. Søknad vil bli sendt om ikkje så lenge, og dei tek sikte på å kunne starte undervisning om 3-4 år.

Ekspedisjonssjef Jan Levi i Utdannigns-og forskingsdepartementet seier til Klassekampen at det vil ta opp mot eitt år å vurdere ein slik søknad.

- Sjølv om søknaden vert godkjent, er det ingen automatikk i at ein slik høgskule vil få statsstøtte, seier Levi.

Kristeleg statsvitskap
Levende Ord tek sikte på å utdanne journalistar, så vel som lærarar til bruk i eigne og andre skular. Men dei tygg også på å tilby undervisning i kristeleg statsvitskap.

- Vi trur at all statsvitskap utgår frå Gud, på den måte at all autoritet kjem frå Gud. Derfor vil vi også byggje forståinga av staten kring kunnskap frå Bibelen. Det er å undrast over at Bibelen ikkje vert lest meir av statsvitarar i dag, seier Hammerstad.

Hammerstad minner om at dette ikkje må forstås slik at at einkvar ond diktator er innsett av Gud, men at all makt kjem frå den allmektige.