Fart på kollektivtransporten (11.2.04, 13:35)

Reklame på bussbillettane? Haldeplassar inne på kjøpesentra? Dette er bare byrjinga. Skal ein få fart på kollektivtransporten, må nokon tenke nytt. Torsdag samlast 200 studentar på Samfundet for å leggje sine hovud i bløyt.

Skrekkvisjon: Dersom desse ikkje skal få ha vegane åleine, må ein tenke nytt.

Noreg har store utfordringar på transportsektoren. Korleis skal ein få fleire til å reise kollektivt?

Torsdag 12. februar er Samfundet via hjernestorm for å skaffe nye idear, og den som vil, kan kome og vere med. Arrangør er Start NTNU, og ansvarleg Magnus Horn Strømmen reknar med at 200 studentar kjem.

- Vi ønskjer oss gode, og gjerne litt sprøe, idear, seier Strømmen, og fortel at ei rad store verksemder kjem for å lytte. NSB, Telenor FoU, Q-free, Sintef deltek. Ein vil også ha ein workshop med idedoktorar frå Oasen.

Ikkje minst NSB, kan ha særs godt av å få nokre gode idear, stadfester Strømmen.

Billebare billettar
- Gode idear, seier de. Men er det ikkje berre å halvere billettprisane, så strøymer folk til?

- Det kan godt vere. Men går det an å tenke nytt også her? Ein kan til dømes prøve å selje reklameplass på billettane, og slik subsidiere prisane. Ein annan moglegheit er å ha eigne busstasjonar inne på kjøpesentra sine område, mot at dei er med på å betale. Det finst meir enn ein måte å gjere ting på.

Eiga verksemd?
Strømmen lokkar deltakarane med moglegheiter for eigenytte: Dei gode og levedyktige ideane kan danne grunnlag for eiga kommersiell verksemd, seier Magnus Horn Strømmen.

Arrangementet har fått tittelen "Fantasi:Transport". Start NTNU er ein studentorganisasjon som arbeider for nyskaping.

Av Tore Oksholen