LESERBREV

Jardar E. Abrahamsen: «...for at han skal finne ut hvor håpløst det blir» (8.12.04, 20:42)

Fagforeiningane ved universitetet har fått midlar for å undersøkja korleis ei samlokalisering vil påverka arbeidsmiljøet. Universitetsdirektør Maudal kommenterer dette slik i Adressa 7. desember: «De har engasjert Per Knudsen for at han skal finne ut hvor håpløst det blir.»

Dette kan tolkast på fire måtar.

Anten er universitetsdirektøren frekk, og ytrar ein dårleg underbygd kommentar om at fagforeiningane driv skite spel. I så tilfelle gjev han substans til sin eigen spådom om dårleg arbeidsmiljø ved universitetet.

Eller så er universitetsdirektøren rett og slett ærleg og oppriktig. Då seier han ikkje anna enn at ei sannferdig undersøking vil avsløra at ei samanstimling på Gløshaugen vil føra til dårleg arbeidsmiljø. Tolkar me universitetsdirektøren på denne ærlege måten, trengst ikkje undersøkinga, for me har allereie universitetsdirektørens lovnader om at han skal arbeida for å realisera eit dårleg arbeidsmiljø.

For det tredje kan det sjølvsagt òg tenkjast at universitetsdirektøren fryktar at dei som ber om ei undersøking, får det svaret dei vil ha. Då må ein undrast over at universitetsdirektøren ikkje allereie har tinga si eiga tilsvarande undersøking. Kan dette vera fordi universitetsdirektøren allereie er overtydd om at det i hans tilfelle ville vera både påfallande og høgst uforklarleg om han fekk det svaret som han hadde kjøpt? Eller er det så enkelt som at direktøren aldri rakk å reflektera over at arbeidsmiljøet kunne vera verdt å fokusera på?

Den fjerde tolkinga er sjølvsagt at universitetsdirektøren rett og slett er sur fordi folk ikkje vil lata han få viljen sin.

Når ein ser på korleis dragvollingar og gløshaugingar samarbeider mot direktøren sin, har me i det minste falsifisert påstanden om at folk må stablast saman inni ei trafikkmaskin for å finna det naturleg å samarbeida.

Jardar Eggesbø Abrahamsen