Rokonkurranse på Nidelva
(12.7.05, 08:23) Universiteta i Oxford og Cambridge har utfordra kvarandre til rokonkurranse i 150 år. 21. august skal HiST og NTNU ta opp tradisjonen og ro om kapp opp Nidelva. Initiativet kjem frå studentane, etter at NTNUI har slått NHH sitt rolag i England:
- Inspirasjonen kjem heilt klart frå England, seier Studenttingsleiar Ronny Sødahl Furunes.
 |
| ØVING GJER MEISTER: Velferdstingsleiar Edina Ringdal set kursen, Ronny Sødahl Furunes og leiar Andreas Bach i Studentparlamentet på HiST gjer jobben. |
Akademisk tvekamp
NTNUI skal møte HiST-studentane sitt idrettslag, HiSSI, i kapproinga, som skal gå frå fjorden til Marinen. I tillegg skal eit dekanlag frå kvar av utdanningsinstitusjonane møte kvarandre. SINTEF og St. Olavs Hospital kastar seg også på i noko som blir ei akademisk storhending. Laga skal ro i åttemannssculler, som i den britiske tvekampen.
Ein festdag
Det blir ein hektisk dag for den som skal få med seg alt. Samme helga står NTNUI som medarrangør av NM i sandvolleyball, og finalen sundag blir StudentfestEN på torget, i regi av StudiebyEN.
- Vi ønsker at dette skal bli ei oppleving for dei nye studentane, men det skal også vere ein fest for Trondheim by, seier Ronny Sødahl Furunes.
-Skal bli tradisjon
Planen er at tilskodarane på Marinen skal kunne følgje løpet på storskjerm, og ein jobbar for å få ei kjend sportsrøyst til å kommentere konkurransen. Etter at vinnarane er kåra, går turen i prosesjon til Torget og StudentfestEN.
Målet er at arrangementet skal bli ein tradisjon. Det står om akademisk ære, og Furunes oppmodar studentar og tilsette om å møte opp for å heie fram ein siger til NTNU.
Kamp på kniven
NTNUI-leiar Per Kristian Helland er sikkert på siger, men HiST-studentane lovar kamp på kniven:
- Vi skal gå på med dødsforakt. Vi kan ikkje ta NTNUI på teknikk, men skal ta dei på viljen, seier Lennart Krohn Hansen frå HiSSI.
Studenttingsleiaren er førebels i arrangør-rolla, men lovar å gjere sitt for NTNU:
- Hvis dette blir ein suksess, reiser eg over til England på opplæring, avsluttar Furunes.
Tekst og foto: Håvard Hamnaberg | 
