Entusiastar frå keisarriket (17.9.07, 06:55)

Alle snakkar om Kyoto, men nyleg kom Kyoto-folk til Dragvoll.

Onsdag og torsdag vart NTNU gjesta av Japan-Norway Student Forum.

Fem studentar frå Doshisha universitet i Kyoto har vore her. Dei har hatt fest på Moholt, seminar om utdanning i Norge og Japan og utstillinga Japan through five senses på Dragvoll.

JAPAN MØTER DRAGVOLL: Kyoto-studentane ivrar for å få til eit Norge-Japan studentforum. Kanskje dette er starten.

Før NTNU-besøket har dei vore i Oslo og treft Gahr Støre og Djupedal, og dei har vore i Ålesund og Geiranger, det siste i finver. Det var ca tretti studentar på seminaret og ca femti på festen: masse japansk mat og sake.

Manglar i japansk medvit
Forumets president Souichi Minakawa har budd i Bodø og i Hovden i Setesdal. Han ivrar sterkt: - Det er ikkje så mye informasjon om Norge i Japan, vi vil informere.

Det var stor interesse for femsansarutstillinga på Dragvoll, men folkemengder er dei vel vant til, dei som kjem frå den gamle keisarhovudstaden Kyoto. Der utgjer talet på studentar om lag 75 prosent av talet for heile Trondheims befolkning.

Katedralen, iallfall
- Vi er leie for at vi ikkje får så mye tid til sjølve byen, seier dei, vi må prøve å få med oss Nidarosdomen.

Ein ting må poengterast av den entusiastiske Souichi Minakawa før dei fer:
- Vi vil veldig gjerne ha eit tilsvarande forum i Norge. No har studentane frå Kyoto gjort ein innsats for å få til dette.

Tekst og foto Kjell Håve

 Se bildeserie