Lærevillige frå Folkerepublikken (28.9.07, 07:45)

I to dagar gjestar den kinesiske partiskolen NTNU. Det er bistandsminister Erik Solheim som har invitert.

I RÅDSSALEN: Li Junru er visepresident for partiskolen. Til venstre fylkesvaraordførar Ola Huke.

I går var delegasjonen frå den kinesiske partiskolen først gjestar hos Sør-Trøndelag fylke før dei ankom Gløshaugen. Det var i stor grad fokus på energi og miljø, med orientering om aktuell NTNU/SINTEF-forsking på området og med omvising i energilaboratoriet.

Kina er prioritert
Prorektor Julie Feilberg orienterte kort om NTNUs strategiske satsingområde, fortalde at Kina er topprioritert som internasjonalt samarbeidsområde, og la fram ei lang liste over dei kinesiske universiteta NTNU samarbeider med.

Det er vidare meininga at kinesarane skal lære om den norske velferdsstaten og om norske velferdsgode. Det blir såleis omvising på kvinneklinikken på St. Olavs hospital og på Edda legesenter.

Før det skal NTNUs kjende professorar Steinar Westin og Arnulf Kolstad orientere om primærhelsetenesta og om psykisk helsevern.

FRÅ KINA TIL GLØS: Gjestane frå den kinesiske partiskolen og deira første møte med NTNU. Før på dagen har dei vore gjestar hos Sør-Trøndelag fylke. Og NRK har vore med heile dagen.

Inn i framtida via NTNU
Partiskolen er vel ikkje kjent i Norge, men bak invitasjonen ligg ein tanke om at dette særleg er den institusjonen som står for moderniseringa av det kinesiske samfunnet.

Tekst og foto Kjell Håve