LESERBREV

Rune Skarstein: Ådne, du roter deg bort! (23.10.08, 09:33)

Ådne, no syns eg og veldig mange andre ved NTNU at du begynner å rote deg bort! Eit problem med "samfunnsrepresentasjonen" i NTNU-styret er, som du sikkert er klar over, at det slett ikkje er ein samfunnsrepresentasjon.

Før du og Marit Arnstad kom inn, var det berre direktørar frå bankar og anna næringsliv som utgjorde "samfunnsrepresentasjonen". Altså representantar for den norske næringslivseliten. Og dei avslørte fort at dei hadde null peiling på kva eit universitet er for noko! Eg reknar med at du og Marit ikkje vil hevde noko så absurd som at de "representerer samfunnet".

Alt snakket om "samfunns"-representasjon ved norske universitet fungerer som tilsløring av samfunnsmessige maktforhold. Dersom dei eksterne representantane arbeidde etter ein generall instruks frå departementet, måtte rådføre seg med departementet i kontroversielle saker og rapportere attende til departementet, ville det i det minste bli litt meir konsistens i dette opplegget.

For fleire år sidan foreslo eg til nokre kollegar at vi kunne prøve å øve press på departementet for å få inn Kjartan Fløgstad eller ein annan framståande kulturperson i NTNU-styret. Reaksjonane eg fekk (det var vel under Bondevik I) var at å prøve på det ville vere totalt bortkasta strev. Når vi først skal ha ekstern styrerepresentasjon (som etter mitt skjønn er ein uting med den noverande ordninga): Kvifor ikkje også ein profilert person frå fagbevegelsen, til dømes Jan Davidsen eller Randi Reese? Eller samfunnsdebattantar som Ottar Brox, Helene Bank eller Gudleiv Forr? Men slikt vil nok aldri skje, sjølv med ei raudgrøn regjering. V.h. Rune