Rektor: - Reelt handlingsrom viktigast (25.2.03, 09:03)

Konfrontert med fagforeininganes negative haldning til særlovselskap, viser rektor Eivind Hiis Hauge til NTNUs høyringsfråsegn i samband med instillinga til Mjøsutvalet.

- Her stilte NTNU seg positivt til særlovselskap i motsetnad til dei andre tre universiteta. På det tidspunkt var ikkje dette med særlovselskap definert presist nok til å et ein kan seie definitivt ja eller nei, men denne positive grunnhaldninga må vere utgangspunkt for Rektors haldning. Når modellen vert definert meir presist, får vi sjå – ut frå ein totalvurdering – om vi vil gå for særlovselskap eller ikkje, seier Hauge.

Eit grunnleggjande poeng med særlovselskap er at ein i prinsippet får større handlingsrom. Men det må vere avgjerande at ein får dette også i praksis, poengterer rektoren.

- Gulrot trengst
- Dette heng mellom anna på dei økonomiske rammevilkåra. Om dei ikkje vert gode nok, forsvinn gulrota. Då vert også motivasjonen for å gå inn for dette, vekk.

- Vitsen er jo at ein får totalansvar. Og om ikkje ansvaret omfattar eigedomsmasse og realistiske avskrivingsreglar, er ikkje dette lenger interessant.

Britane slit
Ein artikkel i The Independent viser at mange engelske lærestader slit. Det er med andre ord ingen automatikk i at privatisering fører til betre økonomi?

- Det er opplagt. Vi er som universitet avhenging av eigaren i alle høve. Men eg tek det som premiss at NTNU vert oppfatta som viktig for det norske samfunn totalt sett. Då må vi ha tillit til at departementet ikkje dreg det økonomiske teppet vekk under NTNU. Såpass sjølvtillit må all strategitenking ved NTNU bygge på, elles vert tenkinga meiningslaus.